روحت قعدت وسط ولادي التانيين وبقيت أوزع عليهم الشوكولاتة والضحك وكنت بلمحها من طرف عيني وهي راجعة للمطبخ كتافها محنية وروحها بتتسحب منها بالبطيء. الغريبة إني كل ما بشوف كسرتها بحس براحة وقتية وكأني بدفن ذكريات قديمة في القبر اللي بحفره ليها كل يوم.. مابقتش شايفة فيها بنتي بقيت شايفة فيها العدو اللي لازم أكسره قبل ما يكسرني.
جه الليل والبيت كله هدي إلا نار غلي اللي مش بتطفي. ناديت عليها بصوت زي الكرباج
تعالي هنا يا وش الفقر!
جت ماشية ببطء وعنيها في الأرض وشها كان لسه عليه أثر صوابعي معلمة بوضوح. مسكت خصلة من شعرها الطويل الناعم اللي بيجنني لمجرد إنه أحلى من شعري ولويتها ورا راسها بقوة لحد ما رقبتها اتفردت لفوق
بكرة عندنا عزومة كبيرة.. عيلة أبوكي كلها
جاية. وعاوزاكي زي الشاطرة كده تلبسي أتفه لبس عندك وتلفي الطرحة دي زي الخدامات وتفضلي داخلة خارجة بالصواني وما تفتحيش بقك بكلمة. لو شفتك بتضحكي ولا بتحاولي تلفتي نظر حد بجمالك المصطنع ده ههينك قدامهم كلهم ومش هسمي عليكي.
نزلت دمعة من عينها غصب عنها فضحكت بسخرية وقلت
وفري دموعك دي للمواعين اللي هتغسليها بكرة.. ياللا غوري اترمى في الطرقة ومش عاوزة أسمع لك نفس لحد الفجر تقومي تجهزي الفطار لإخواتك قبل ما ينزلوا.
رميتها بعيد عني وكأني برمي حاجة نجسة وقبل ما تخرج من الأوضة ندهت عليها تاني
استني.. الهلال السوليتير اللي لبساه ده اقلعيه.. ده خسارة في رقبتك روحي البسي أي حاجة صفيح تليق بمقامك.
قلعت السلسلة وإيدها بتترعش وحطتها على الكومودينو من غير ولا كلمة. خرجت وسابتني قاعدة بصيت للسلسلة وبصيت لنفسي في المراية وحسيت براحة بشعة.. أنا مش بس بكسر بنتي أنا بقطع كل الخيوط اللي ممكن تخليها أحسن مني في يوم من الأيام. هي لازم تعيش في ضلي مكسورة ومطفية عشان أنا بس اللي أنور.
يوم العزومة جه والبيت كان مليان بحبايب أبوها وقرايبه. كنت واقفة زي الملكة في وسطهم لابسة أشيك حاجة عندي ومركبة الابتسامة المزيفة على وشي وهي.. كانت زي الخيال الباهت في وسطنا.
دخلت الصالة وهي شايلة صينية القهوة التقيلة كانت لابسة عباية قديمة وماسحة وشها من أي زينة ومنزلة عينيها في الأرض زي ما أمرتها. واحدة من قرايب أبوها بصت لها بشفقة وقالت
ما شاء الله البنت كبرت وبقت عروسة وشبهك بالملي يا أم فلان بس مالها دبلانة كدة ليه هي تعبانة
الكلمة نزلت على ودني زي مية النار. شبهي وعروسة
ضحكت بجليد وقلت بصوت عالي قصاد الكل عشان أحرجها
عروسة إيه بس يا حبيبتي دي خيبتها قوية لا ففلح في علام ولا نفع في علام أهو مأعداها في البيت تخدمنا وتتعلم أصول الطبيخ بدل ما هي خردة كدة حتى القهوة اللي شايلاها دي أنا اللي عملاها هي يدوب شيالة مش أكتر.
شفت كتافها اتهزت وهي بتوزع الفناجين وإيدها اترعشت والفنجان خبط في الطبق وعمل صوت. انتهزت الفرصة وقمت وقفت ونطرت إيدها بعنف القهوة اتدلقت على العباية وعلى السجادة فصرخت فيها بمنتهى الغل
يا غبية! حتى دي مش عارفة تعمليها إنتي إيه فايدتك في الدنيا غير إنك تاكلي وتنامي غوري من قدام الوشوش النظيفة دي اطلعي على المطبخ انزلي تحت الرجلين نضفي القرف اللي عملتيه ده!
البنت لمت الفناجين المكسورة بإيدها من غير ما تنطق والكل كان بيبص لي بذهول من قسوتي بس أنا مكنش يهمني حد.. كان كل همي إني أطفي النظرة اللي في عين الست اللي قالت إنها شبهي.
دخلت وراها المطبخ وبمجرد ما الباب اتقفل مسكتها من شعرها وخبطت راسها في حافة الحوض
بتكسري الفناجين عشان تكسريني قدامهم فاكرة إنهم هيصعب عليهم والله لاخليكي تتمني الموت وما تلاقيهوش النهاردة.
جبت سلك المواعين الخشن وحطيته في إيدها وقلت لها بفحيح
السجادة اللي برة دي تتمسح بالسلك حتة حتة ولو لمحت بقعة واحدة بعد ما يمشوا هحرق قلبك بجد المرة دي.. ياللا انزلي على ركبك وازحفي زي الكلاب لحد ما تنظفي اللي بوظتيه.
خرجت ورجعت قعدت وسطهم ببرود وضحكت
معلش يا جماعة البنت دي ايديها سايبه مابتفهمش غير بالعين الحمرا.
بعد ما العزومة خلصت والناس مشيت لقيتها لسه ساجدة على ركبها في الصالة إيديها كانت بتنزف من سلك المواعين الخشن والسجادة مبلولة بدموعها قبل ميتها. بصيت لها بقرف رفعت
رجلي وزقيتها في كتافها وقعتها على وشها وقلت لها ببرود
قومي يا روح أمك اخلصي نشفي القرف ده وبعدين اطلعي بوسي إيد إخواتك عشان يرضوا عنك ويخلوكي تنامي في الطرقة النهاردة ولا تحبي تقضيها في البلكونة في البرد ده
قامت ببطء جسمها كان بينتفض وكأنها في سكرات الموت وعينيها كانت خالية من أي روح. مشيت من قدامي زي الخيال ودخلت المطبخ تجيب قماشة ناشفة. فجأة سمعت صوت حاجة معدن بتقع على الأرض.. صوت سكينة المطبخ الكبيرة.
روحت وراها بخطوات سريعة وأنا نيتي أهبد راسها في الحيطة لقيتها واقفة وماسكة السكينة في إيدها وبتبص لنفسها في مراية المطبخ الصغيرة.. كانت بتبص لشبهي اللي في وشها بغل يفوق غلي.
