آيه عروس الخصوص و 55 يوم زواج الباب خبط كان علي الساعه 11 خبط خبطه رايقه، هو لما بيكون راجع مزاجه حلو كان بيطبل علي الباب . أم آيه قامت فتحت، لقت جوز بنتها. استغربت لأنه بيرجع بعد العشاء مش دلوقتي. سألته: مالك؟ تعبت تاني؟
لانه كان بقاله كام يوم معدته وجعاه. بص في الأرض وقالها آه من غير عينه ما تيجي في عينيها. آية وقتها كانت نايمه في أوضتها ، آية كل الناس دعت لها اللي يعرفها واللي ما يعرفهاش، واتعمل لها عمرة مرتين ، آيه ضحكت 3 مرات وهي على الغُسل ومسكت إيد والدتها والكل كان مذهول.
آية عندها 37 سنة منفصله من 9 سنين، وعندها بنت 12 سنة ،زوجها الأول كان كويس بشهادة والدتها بس مفيش نصيب علي حسب ما قالت كميتهم ما ركبتش علي بعض وفضلوا فتره عايشين مع بعض علشان بنتهم وبعدين خرجوا بالمعروف والراجل ملزم ببنته وبيصرف عليها .
ايه كانت ميكب آرتيست، وفجأة اتغيرت ، سابت شغلها لوجه الله ، و نزلت تشتغل في مطعم أخوها بدأت تحفظ قرآن. لبست النقاب وغيرت استايل لبسها ، بدأت تاخد دروس في الدين والشريعه أونلاين. و في أحد الدرس اتعرفت على أخت محمد، كانت بتحفظ معاها، و هي اللي رشحتها لأخوها ، اللي أول ما شاف صورتها قال بس هي دي اللي عايز اكمل حياتي معاها.
محمد اتقدم 4 مرات في 5 سنين وكل مره يترفض. أخوها كان شايف إن محمد غير مسؤول رغم إنه 36 سنة ولم يسبق له الزواج ، ايه كانت قريبه جدا من اخوها وكانت بتسمع كلامه .لكن أخت محمد فضلت وراها لحد ما أقنعتها ، وراحت آية قالت لأخوها انها موافقة عليه، وقالت له “شايفاه الإصلاح ليا “بعد استخارة ثلاث مرات “.
الاخ حب يرضي اخته وراح سأل عليه وعلى أهله والكل شكر فيهم. طب محمد كان بيشتغل ايه ؟!محمد كان عامل في صيدلية، واشتغل مدرس فتره كان بيدي دروس، وكان بيحفظ الأولاد قرآن، وحاول يفتح مشروع وفشل.
أهل آية أجروا لها شقة ، واتجوزت على عفشها، وأهلها دفعوا إيجار اول شهر لانه مكنش معاه ، ايه قعدت من شغلها وتفرغت لبيتها. طب طبعه ايه مفيش حاجه بانت عليه خلال ال 55 يوم ؟! اخوها قال إنه …
كان بيغير عليها ولو اتصل بيها و ماعرفتش ترد عليه يعمل معاها مشكله ده في فتره الخطوبه وحصل شد وكانوا هيفركشوا بس عملوا قاعده ووقتها ايه اشترطت عليه بلاش عصبيه وبلاش صوت عالي وأنها تقعد في الخصوص جنب امها وأخوها وهو وافق
والدتها قالت إنه …كان قماص و بيزعل على حاجات صغيرة، زي الأكل ملحه زيادة، يقوم ويسيب الأكل، وآية تفضل تراضيه. وكان بيأمّهم في الصلاة، وآية تبوس إيده وتقوله ربنا يديمك عليا نعمة ،كان من البيت للشغل ويرجع يلاقيها عروسة مستنياه، ولحد يوم الواقعة مكنش فيه حاجة، وكان بيكلمها شات وبيحب فيها وهو جاي في السكه.
يوم الواقعة آية صحيت، عملت لوالدتها حاجة دافية لأنها مقيمه معاها في نفس الشقه، ودهنت رجلها بالمرهم لأنها تعبانة، ورجعت نامت وقالت هتصحى على أذان الظهر علشان تصلي، وهو رجع اليوم ده بدري الام قامت فتحت له ومريم بنت آيه كانت كانت نايمة جنبها
آيه صحتها ودخلتها اوضتها، والأم دخلت أوضتها وقفلت عليها الباب، وعينيها راحت في النوم فجأة قامت مفزوعه لما سمعت صوت. طب ما سمعتيش اي حاجه خالص في النص ساعه او الساعه إلا ربع اللي فاتوا؟!
والدتها قالت والله ما سمعت، وعندي ثقه إنها مطلعتش أي صوت عشان ما اتوجعش، خافت عليا وعلى بنتها ، أنا قومت لقيت الباب مفتوح قعدت أنده يا آية يا آية. ورجلي متشنجة قولت تيجي تدعك لي رجلي زي ما بتعمل لكن ما ردتش، قومت لبست الإسدال، فتحت لقيت أمين شرطة قالي ادخلي واقفلي الباب، احنا بنعاين المكان ،دخلت وحاولت أطلع تاني، دخلني كلمت اسلام ابني جه جري.
أخو آية بيقول …. لما جيت لقيت الشارع مقلوب إسعاف و عربيات شرطه في كل مكان طلعت لقيت محمد قاعد في الصالة، سألته ؟! في ايه يا محمد ، فين آية؟ المأمور لما عرف اني اخوها قالهم ينزلوا محمد تحت واخدني الاوضه وقالي اللي حصل
مين اللي بلغ ؟! هو خلص وقعد شويه، وبعدين أخد تليفون آية واتصل بالإسعاف والشرطة. لما رحنا القسم المأمور قالي اطمن على أختك لما دخلنا عليها كانت ببتتشاهد ،آية كانت بتتشاهد وبتقول أذكار قبل ما تنام، ودخل عليها وهي نايمة ومسلّمة أمرها لله، كانت نايمة زي الملاك.
طب عمل كده ليه؟والدتها قالت بسبب حلم وهو أكد كدا لما سألوه في النيابه طب الحلم كان عباره عن ايه ؟!قال أنه شاف صاحبتها في المنام جت تبارك لها، ولما آية دخلت تعملها حاجة تشربها، اتكلمت معاه ورائحه فمها كانت منفره و قالت له إن مراتك اللي فرحان بيها سمعتها مش كويسة.
هو يعرف صاحبتها؟أبدًا، ولا شافها، ما يعرفش غير اسمها، وإن آية كانت شغالة معاها في البيوتي سنتر ولما وصفها زي ما شافها في الحلم آيه قالت له مش دي مواصفاتها في الحقيقة. الكلام ده كان قبل الواقعه ب 15 يوم ووقتها حصل بينهم مشكله ،ووالدتها قالت له، انت بتشك في بنتي يبقى ما تلزمناش، ومسك تليفونها قلب فيه، لقى العيال اللي شغالين مع أخوها واحد بيقولها يا با وواحد بيقولها يا أسطى، والدتها قالت له: ده يثبت إنها بتتعامل أكنها راجل في الشارع.
راح للشيخ اللي بيحفظ معاه وحكى له على الحلم، قاله:انت سايب فجوة للشيطان والتزم بالورد بتاعك ،والدتها قالت له ربنا قال إذا جاءكم فاسق بنبأ فتبينوا. عم سعيد والد آية قال بنتي كلمتني روحت لها جاري، لقيته بيقولي اول ما دخلت .
.. أنا آسف مكنتش فاهم حاجة ، آية قالت لي بيفتش في تليفوني. سألته: لقيت حاجة؟ قال: لأ. واعتذر وقالي ، الشيطان ضحك عليا، قولت له ، شيطان ايه دي المصلية مش بتتشال والقرآن علي طول شغال. دي أول مرة، لو حصلت تاني نطلع بالمعروف، و فكرنا أن المشكله خلاص انحلت ما عرفش أن الحلم هيفضل مكمل معاه.
وقال كمان أنه دفع له أو شهر ايجار ، و راح له بعدها يستلف منه 12 الف جنيه ولكن والد آيه اعتذر وقاله مش معايا حاول تتصرف من اهلك
آية قالت لزوجة أخوها إنها حاسه بكرب شديد و عندها يقين أن أول شهر 11 ربنا هيفرجها عليها، واتوفت 2/11
ايه كانت اتفقت معاه إن مهرها يحفظها سورة البقرة وآل عمران مرات اخوها قالت إنها كانت آية ماشية على الأرض. ربنا يرحمها ويصبر أهلها، ويسخر ليها اللي يدعي لها زي ما كانت بتدعي للناس. ووالدتها مش طالبه من الناس غير أنهم يدعوا لها
إيه رأيكم؟ حلم ممكن يهد بيت؟ ولا الشك لما بيدخل قلب حد بيخليه يشوف كل حاجة غلط حتى لو اللي قدامه ملاك؟ده كلام أهل ايه من خلال لقائهم في برنامج الشفره مع المذيعه علا سوشه#آية #الشفرة
