حلقوا شعري

نزلت من عندها وأنا مش شايف قدامي، الدموع اللي حابسها في عيني كانت حرقاني أكتر من النار. ركبت العربية وخدت هنا في حضني، وفضلنا قاعدين جوه العربية أكتر من ساعة. البنت مكنتش بتبكي، دي كانت بتترعش، ص,دمة طفلة شافت غدر
من حد المفروض إنه من أهلها.
كلمت مريم في التليفون وصوتي مخـ,نوق، أول ما سمعتني وعرفت اللي حصل، سابت النبطشية وجت جري على البيت. لما دخلنا وشافت البنت، مريم اتمرمت في الأرض من الصدمة، فضلت حاضنة هنا وبتعيط بحرقة وتقول حسبي الله ونعم الوكيل فيكِ يا شيماء.. ربنا ينتقـ,م منك يا مؤذية.

في الليلة دي، مريم عملت حركة عمري ما هنساها؛ جابت مكنة الحلاقة وقالت لي احلق لي راسي يا رأفت. رفضت وبكيت، بس هي صممت وقالت بنتك لازم تحس إن شكلها مش عيب، وإننا معاها في كل حاجة. وحلقت مريم شعرها ع الزيرو، وأنا كمان حلقت شعري، وبقينا احنا التلاتة شكل واحد عشان هنا ما تحسش إنها منبوزة أو لوحدها. مريم نزلت اشتريت لها تلت باروكات شكلهم جميل جداً، ولفات طرح ملونة شبه الأميرات، وقعدنا نقنعها إن ده لوك جديد للأميرات لحد ما شعرها يطول تاني.

يوم الحساب.. الأحد الصبح
شيماء كانت فاكراني رأفت الطيب، الغلبان اللي بيخاف من كلمة قطع صلة الرحم، وفاكرة إنها ماسكاني من إيدي اللي بتوجعني ببناتها. بس هي نسيت إن الشقة اللي هي قاعدة فيها دي.. مكتوبة باسمي أنا.
أنا اللي كنت شاري الشقة دي من خمس سنين تمليك عشان أأمن مستقبلي، ولما اتطلقت صعبت عليا وقعدتها فيها من غير ما تدفع مليم، وكنت بدفع لها مصاريف الغاز والمية والكهرباء باسمي، وبديلها فوقيهم مصروف شهري.
الساعة تسعة الصبح، كلمت سمسار معرفة وصاحب عمري اسمه عصام.

عصام، الشقة بتاعتي اللي قاعدة فيها أختي.. عايزها تتباع النهاردة قبل بكرة، وبأي سعر، وعايز عقد إيجار جديد للمشتري يستلم الشقة فوراً.
عصام قالي يا رأفت دي أختك!، قلت له بجفاف عمري ما حسيته قبل كده أنا معنديش إخوات.. الشقة للبيع يا عصام، والعمولة بتاعتك هتتضاعف لو خلصت النهاردة.
الشقة كانت في موقع لقطة وسعرها مرتاح، وعصام في ظرف تلات ساعات كان جايب مستثمر عايز يشتريها كاش عشان يأجرها. دخلنا الشهر العقاري، ووقّعت على عقود البيع، وقبضت الفلوس. المشتري الجديد كان راجل حوت ومبيخافش، ومعاه محامي بياكل الجو.
الانهيـ,ار الكبير

الساعة خمسة المغرب.. تليفوني بدأ يرن.
رقم شيماء.. كنسلت.
رنت تاني وتالت وعاشر.. مبردش.
بعدها بدأت تبعت رسائل صوتية على الواتساب، في الأول كانت بتهدد أنت باعت لي بلطجية يا رأفت؟ جايب لي ناس يقولوا لي الشقة اتباعت وعلينا إخلاء في ظرف 48 ساعة؟ أنت اتجننت؟
ما ردتش.
الرسالة اللي بعدها صوتها بدأ يتغير، الثقة والبرود اتمحوا وحل مكانهم الرعب رأفت.. رد عليا بالله عليك! الراجل واقف ومعاه المحامي وبيقولي لو ما طلعتيش هنرمي العفش في الشارع وهنعمل قضية طرد غصبي.. رأفت أنا أختك! هروح فين بالبنات؟
كتبت لها رسالة واحدة بس

مش أنتِ قلتي لي وريني هتعمل إيه يا راجل يا كبير؟ أنا وريتك. الشقة مابقتش ملكي، والراجل اللي شاري مش قريبي ولا يعرف يعني إيه صلة رحم. قدامك 48 ساعة تلمي هدومك وتطلعي، وإلا عفشك هترميه الشرطة في الشارع.
شيماء ملقيتش قدامها غير إنها تيجي لحد بيتي. الباب خبط خبط هيستيري، فتحت الباب ووقفت على العتبة ومنعتها تخش. كانت منهارة، عينيها حمرا، ودموعها نازلة من الخوف والبهدلة.
أبوس إيدك يا رأفت.. بلاش خراب بيوت، أنا ماليش غيرك! هروح فين ببناتي في الغلا ده؟ الإيجارات برة بتقطم الظهر وأنا معيش تمن إيجار شهر واحد!

بصيت لها وبرودي كان أقوى من دموعها بناتك؟ وأنتِ مفكرتيش في بنتي ليه وهي بتعيط وبتقولك لأ وأنتِ دايسة عليها بالمكنة؟ مفكرتيش في كسرة قلب طفلة عندها سبع سنين؟
صرخت وهي بتعيط كنت غبية.. كنت غيرانة منك ومن عيشتك ومن فرحة بنتك!

شيطان ودخل بيننا يا رأفت.. سامحني عشان خاطر دم أبويا وأمك!
قربت منها وقلت لها بكل حسم
دم أبويا وأمك أنا صُنته تسع سنين، شلتك وشلت عيالك وكنت باجي على بيتي وبنتي عشانك، وأنتِ ردتيلي ده بالغل والسم. من النهاردة.. مصروف مفيش، إيجار مفيش، نت ومية وكهرباء مفيش. شوفي بقى مين هيشيلك أنتِ وعيالك، وروحي للكوافير اللي بوظتي فيه نفسية بنتي خليهم يأكلوكي.
قفلت الباب في وشها.. ولأول مرة من سنين أحس إن صدري ارتاح.
النهاية

شيماء ملقيتش مأوى غير إنها تأجر أوضة وصالة في منطقة عشوائية بعيدة جداً، وباعت نص عفشها عشان تدفع تمن السمسار والمقدم، وبناتها اتنقلوا من مدرستهم الخاصة لمدرسة حكومية عادية لأن مفيش مصاريف. الضحكة الصفرا والتريقة اتمحت من حياتها للأبد، وبقت بتلف حوالين نفسها عشان تكفي لقمة العيش.
أما في بيتي.. الفلوس اللي بعت بيها الشقة، خدت منها جزء وحطيته وديعة باسم هنا في البنك عشان تأمن مستقبلها.
وبعد شهرين، شعر هنا بدأ ينبت تاني.. كانت كل يوم تبص في المراية وتضحك وهي شايفة شعرها الكستنائي بيطلع من جديد، بس المرة دي كانت بتضحك وهي حاسة إن وراها أب حقيقي.. سند، مبيسمحش لحد يكسر بنته، حتى لو كان الحد ده من دمه.