قصص و روايات

كانت بتمنعه يدخل الحمام

كانت بتمنعه يدخل الحمام، وبتخليه ينام على الأرض.. ولما اتحاكمت، صدر ضدها حكم بالسجن 20 شهرًا مع إيقاف التنفيذ.

تخيل تبقى مدير في هيئة الصحة البريطانية، وليك شغلك ومكانتك ومرتبك، وبعدين تدخل علاقة عاطفية تنتهي بيك إنك تستأذن علشان تدخل الحمام، ولو الست اللي بتحبها رفضت، تضطر تنزل تدور على حمام في سوبر ماركت أو مطعم.

ده اللي حصل مع جاريث جونز، البريطاني اللي وقع في حب سارة ريجبي، البالغة من العمر 41 سنة، بعد ما اتعرف عليها من خلال تطبيق للمواعدة، وانتقل يعيش معاها في بيتها بمدينة وينزفورد. الست طلبت منه 700 جنيه إسترليني إيجار كل شهر، غير فواتير ومصاريف البيت.

ومع ذلك رفضت تديله مفتاح! يعني الراجل بيدفع إيجار بيت ما يقدرش يدخله إلا بموافقة صاحبة البيت. وبمرور الوقت، سارة بدأت تتحكم في كل تفصيلة في حياته. ممنوع يدخل الحمام، ممنوع يستحم، ممنوع يحلق دقنه من غير إذن. ولو زعلت منه، العقوبة إنه ينام على الأرض من غير بطانية.

ووصل التحكم للأكل كمان، لدرجة إنه خسر حوالي 28 كيلو من وزنه خلال شهرين. والحكاية موقفتش عند الإهانات والتحكم. جاريث قال إنه اتعرض للاعتداء الجسدي، وإنها كانت بتسبب له إصابات. وخلال زيارة للندن، أصرت إنه يشتري لها شنطة ماركة غالية من هارودز، ولما اعترض، تعرض لإصابة في دراعه.

وطبعًا، علشان تكتمل أركان العلاقة، كانت بتفتش تليفونه وتراقب اتصالاته وتمنعه يتواصل مع أهله. والراجل بقى يمسح الرسايل اللي بيبعتها لأمه أول بأول خوفًا من رد فعل حبيبته. ولما كان يحاول يعترض، بحسب شهادته، كانت بتهدده إنها هتبلغ الشرطة وتتهمه هو بالاعتداء عليها!

بعد 9 شهور، جاريث كان خسر، حسب تقديره، حوالي 40 ألف جنيه إسترليني، وخسر جزء كبير من وزنه وثقته بنفسه، واحتاج لمساعدة والدته ومؤسسة متخصصة في دعم الرجال ضحايا العنف الأسري علشان يقدر يخرج من العلاقة. وبعدها احتاج لأكتر من سنة علاج نفسي.

نيجي بقى للعدالة. سارة اعترفت أمام المحكمة بممارسة سلوك قهري وسيطرة على شريكها، وفي مايو 2024 صدر ضدها حكم بالسجن 20 شهرًا، مع إيقاف التنفيذ لمدة سنتين، وأمر بعدم الاقتراب من ضحيتها لمدة 5 سنوات، بالإضافة إلى 35 يومًا من أنشطة إعادة التأهيل.

يعني بعد كل اللي حصل، خرجت من المحكمة من غير تنفيذ عقوبة السجن، بينما الراجل اللي كانت بتمنعه يدخل الحمام كان لسه بيحاول يرجع لحياته الطبيعية. جاريث نفسه عبّر عن استيائه من الحكم، وطرح سؤالًا يستحق المناقشة: هل كانت العقوبة هتبقى نفسها لو الطرف المسؤول عن الأذى رجل والضحية ست؟

القانون المفروض يحمي الضحية من الشخص اللي بيمارس السيطرة والضرر، من غير تمييز على أساس النوع. والأغرب في القصة إن الراجل كان بيدفع 700 جنيه إسترليني كل شهر علشان يعيش في بيت ممنوع يدخل حمامه. القضية تعود إلى عام 2024، وأُعيد تداول تفاصيلها مؤخرًا في الصحافة البريطانية.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى